کوہاٹ میں بجلی چوری کے خلاف کریک ڈاؤن۔

پشاور الیکٹرک سپلائی کمپنی (پیسکو) اور ضلعی انتظامیہ نے ضلع کوہاٹ کے علاقے جرمہ میں بجلی چوری کے خلاف بڑا آپریشن کیا۔

ضلعی انتظامیہ کے مطابق آپریشن کے دوران ضلعی حکام اور واپڈا کے نمائندوں نے عوام سے ملاقات کی اور کنڈا مافیا کے خلاف تعاون کی درخواست کی۔
انہوں نے عوام پر زور دیا کہ وہ بجلی کے بلوں کی بروقت ادائیگی کو یقینی بنائیں تاکہ لوڈشیڈنگ کا مسئلہ مستقل طور پر حل کیا جا سکے۔

ڈپٹی کمشنر کوہاٹ ڈاکٹر عظمت اللہ وزیر نے کہا کہ اس آپریشن کو ضلع کوہاٹ کے دیگر علاقوں تک پھیلایا جائے گا اور بجلی چوری کے مکمل خاتمے تک جاری رہے گا۔
انہوں نے عوام سے اپیل کی کہ کوہاٹ میں بجلی کی فراہمی کو بہتر بنانے کے لیے اس مہم میں ضلعی انتظامیہ اور واپڈا حکام کا ساتھ دیں۔

علاقہ مکینوں نے ضلعی انتظامیہ کے ساتھ مکمل تعاون کا یقین دلایا۔
انہوں نے ریمارکس دیئے کہ بجلی چوری کے خلاف یہ کارروائی نہ صرف قانونی تقاضے پورے کرتی ہے بلکہ عوامی مفاد میں بھی ہے۔

پیسکو حکام کا کہنا ہے کہ بجلی چوری کے خلاف سخت اقدامات کیے جائیں گے اور اس کے مطابق قانونی کارروائی کی جائے گی۔