وزیراعلیٰ نے کوہاٹ کے لیے فنڈز کی منظوری دے دی۔

کوہاٹ سے منتخب اراکین قومی و صوبائی اسمبلی نے ضلع میں ٹرانسفارمرز کی مرمت کے لیے فنڈز کی منظوری پر وزیراعلیٰ خیبرپختونخوا علی امین گنڈا پور کا شکریہ ادا کیا ہے۔

خیبرپختونخوا کے وزیر قانون و خزانہ آفتاب عالم آفریدی ایڈووکیٹ، سابق وفاقی وزیر داخلہ اور پی ٹی آئی کے سینئر رہنما شہریار آفریدی ایم این اے اور اراکین صوبائی اسمبلی شفیع جان اور داؤد آفریدی ایڈووکیٹ نے ایک مشترکہ پریس ریلیز میں وزیر اعلیٰ کا تہہ دل سے شکریہ ادا کیا ہے۔

کوہاٹ میں ٹرانسفارمرز کی مرمت اور دیکھ بھال کے لیے 30 ملین روپے کی خطیر رقم نے عوام کے دل جیت لیے ہیں۔

ان کا کہنا تھا کہ یہ کوہاٹ کے عوام کا دیرینہ مطالبہ تھا جسے وزیراعلیٰ نے پورا کیا۔ انہوں نے اس امید کا اظہار کیا ہے کہ کوہاٹ کے عوام کی ضروریات اور مطالبات کو مدنظر رکھتے ہوئے وزیراعلیٰ خیبرپختونخوا اسی طرح دیگر اہم شعبوں کے لیے بھی زیادہ سے زیادہ فنڈز فراہم کریں گے۔

انہوں نے کہا کہ وہ مل کر کوہاٹ کی ترقی اور خوشحالی کے لیے باہمی مشاورت اور اتفاق رائے سے آگے بڑھ رہے ہیں اور یقیناً اس کے پورے ضلع پر بہت مثبت اور دور رس اثرات مرتب ہوں گے۔